Tababar ku saabsan doorka war-baahinta xilliga doorashada oo ka furmay magaalada Jigjiga
Addis Ababa,May 18, 2021 (Ginbot 11,2013 T.I (FBC/SOMALI)-Tababar ku saabsan doorka war-baahinta xilliga doorashada oo ay si wadajir ah u soo qaban-qaabiyeen Wakaaladda War-baahinta DDS iyo Machadka Saxaafadda ee Mersa Media Institute ayaa ka furmay madasha shirarka ee Wakaaladda War-baahinta DDS.
Tababarkan oo ay ka soo qeyb-galeen hawl-wadeennada Wakaaladda War-baahinta DDS ayaa waxaa furay maareeye ku-xigeenka Wakaaladda War-baahinta DDS Mudane Cabdikarin Cumar Muxummed, isagoo sheegay in uu tababarkani wax-weyn ka tari doono garaadka iyo wadciga suxufiyiinta xilliga doorashada sidii ay xogo xaqiiq oo lagu kalsoonaan karo uga soo gudbiyaan xilliga doorashada, kaas oo ay cashirro ka bixinayaan xeel-dheereyaal dhanka saxaafadda ku takhasusay oo heer qaran ah.
Tababarkan oo socon doona muddo shan bari ah ayaa waxaa ka mid ah cashirrada lagu baranayo shuruucda doorashada looga baahan yahay saxaafaddu in ay u hoggaansanto xilliga doorashada, gaar ahaan wariyeyaasha hannaanka ay uga soo war-bixinayaan iyo tabaha iyo xeeladaha xogta lagu xaqiijiyo ee looga baahan yahay wariyuhu in uu ku dhaqmo xilliga doorashada sidii xogaha bulshada ay gaadhsiinayaan u noqon lahaayeen kuwo aan lahayn eex iyo dhan-xigsiisi, islamarkaasna badhaxtiran.
SRTV Rasmi page