“ሄር ኢሴ”  ኣፍልጦ ምርካቡ እቲ ባህሊ ብዝግባእ ንምሕላውን ንመፃኢ ትውልዲ ንምትሕልላፍን ልዑል ግደ ኣለዎ-ኣይተ ኣደም ፋራህ

ኣዲስ ኣበባ፣ 17 ጥሪ፣ 2017 (ኤፍ ኤም ሲ)ማሕበረሰብ ዒሳ ሶማሌ ዘይተፅሓፈ ባህላዊ ሕጊ “ሄር ኢሴ” ኣብ ዩኔስኮ ምምዝጋቡ ስዒቡ ኣብ ዓለም ለኸ ስታዲየም ድራዳዋ ሰልፊ ድጋፍ ተሳሊጡ።

ኣብቲ ደገፍ ሰልፊ ተረኺቦም መልእኽቶም ዘመሓላለፉ ብመዓርግ ምክትል ቀዳማይ ሚኒስትር ሓላፊ ማእኸል ምትሕብባር ህንፀት ስርዓት ዴሞክራሲን ምክትል ፕሬዚዳንት ፓርቱ ብልፅግናን ኣይተ ኣደም ፋራህ፥ ባህላዊ ሕጊ “ሄር ኢሴ” ብናይ ኢትዮጵያ፣ ጅቡቲን ሶማሊያን ሓበራዊ ፃዕሪ ኣብ ትካል ሳይንስ፣ ትምህርቲን ባህሊን ሕቡራት መንግስታት (ዩኔስኮ) ዘይድህሰስ ቅርሲ ብምምዝጋቡ ዝተሰመዖም ታሕጓስ ገሊፆም።

“ሄር ኢሴ” ኣብ ዩኔስኮ ኣብ ምምዝጋብ እተን ሃገራት ዘርኣይኡ ሓበራዊ ፃዕሪ ጎረባብቲ ሃገራት ኣብ ሓበራዊ ዛዕባታት ብቑርፀኝነት ተሓባቢረን እንተሰሪሐን ናይ ኩሉ ተረባሕነት ዘረጋግፁ ዓወታት ምምዝጋብ ከምዝኽእላ ዘርእይ ኢዩ ኢሎም።

“ሄር ኢሴ” ማሕበራዊ ዝምድና ንምጥንኻር፣ መሰል ዜጋታት ንምሕላውን ዘይምርድዳእ ብዘተ ፍትሓዊ ውሳነ ንክረኽቡ ንምግባርን ዝሕግዝ ከምኡውን ንስሩዕ ስርዓት ፍትሒ ሓጋዚ ዝኾነ ባህላዊ ሕጊ ኢዩ ክብሉ እውን ገሊፆም።

ን “ሄር ኢሴ” ዝተውሃበ ኣፍልጦ እቲ ባህሊ ብዝግባእ ንምሕላው፣ ንመፃኢ ትውልዲ ንምትሕልላፍን ምዕባለ ቱሪዝም ንምስላጥን ካብ ዘለዎ ረብሓ ብተወሳኺ ጎረባብቲ ሃገራት ዘለወን ማሕበራዊን ኢኮኖሚያዊን ዝምድና ንምጥንኻር ልዑል ግደ ከምዝህልዎ ተዛሪቦም።