ልዕሊ 300 ኩባኒያታት ዝተሳተፋሉ ፎረም ቢዝነስ ኢትዮ-ቻይና ኣብ ቤጂንግ ተኻይዱ

ኣዲስ ኣበባ፣ 18 ለካቲት፣ 2017 (ኤፍ ኤም ሲ)ልዕሊ 300 ኩባኒያታት ዝተሳተፋሉ ፎረም ቢዝነስ ኢትዮ-ቻይና ኣብ ቤጂንግ ተኻይዱ።

እቲ ፎረም ብምትሕብባር ኤምባሲ ኢትዮጵያ ኣብ ቻይናን ኮሚቴ ሕውነትን ምትሕብባርን ኢትዮ-ቻይናን ዘሰናደእዎ ከምዝኾነ ተገሊፁ።

ኣምባሳደር ኢትዮጵያ ኣብ ቻይና ተፈራ ደርበው፥ ኩለ መዳይ ርክብ ክልቲአን ሃገራት ብዝበለፀ ንምጥንኻር እቲ ኤምባሲ ጠመተ ሂቡ ይሰርሕ ኣሎ ኢሎም።

ኣብ ዝተፈላለዩ ዓውዲታት ልዕሊ 300 ኩባኒያታት ቻይና ኣብቲ ፎረም ከምዝተሳተፉ እውን ገሊፆም።

ኣብ ዓውዲ ኢንቨስትመንት፣ ንግዲን ቱሪዝምን ኣብ ኢትዮጵያ ዘለዉ ዕድላት ብዝምልከት ዘተ ከምዝተገበረ ምግላፆም ኣብቲ ኤምባሲ ዝረኸብናዮ ሓበሬታ የረድእ።