መገዲ ኣየር ኢትዮጵያ ኣፍሪካ ምስ ከተማ ማንቸስተር ብምርካብ ልዑል እጃም እናተዋፀአ ምኳኑ ገሊፁ

ኣዲስ ኣበባ፣ 25 ለካቲት፣ 2017 (ኤፍ ኤም ሲ) መገዲ ኣየር ኢትዮጵያ ኣፍሪካ ምስ እንግሊዛዊት ከተማ ማንቸስተር ኣብ ምርካብ ልዑል እጃም እናተዋፀአ ምኳኑ ገሊፁ፡፡

መገዲ ኣየር ኢትዮጵያ ናብ ከተማ ማንቸስተር ኣብ ሰሙን ሓሙሽተ ግዘ ዘካይዶ ዝነበረ በረራ ካብ 3 ሓምለ 2025 ከም ኣቆፃፅራ ኣዉሮፓዉያን ዕለታዊ በረራ ከምዝጅምር ኣፍሊጡ፡፡

ካብ ኣፍሪካ ዓብዩ ዝኾነ መገዲ ኣየር ኢትዮጵያ፤ በረራ ንምዕባይን መማረፂ በረራ ንምስፋሕን ከምዝሕግዞ መዕርፎ ነፈርቲ ከተማ ማንቸስተር ገሊፁ፡፡

ብተመሳሳሊ ከተማ ማንቸስተር ምስ ናይሮቢ፣ ጆሃንስበርግ፣ ዛንዚባር፣ ዳሬሰላም፣ ሃራሬን ሉሳካን ዝኣመሰሉ መባፅሕ በረራታት ኣፍሪካ ንምርኻብ ልዑል ግደ ከምዘለዎ ተመላኺቱ፡፡

ድሕሪ ኣዋርሕ ዕለታዊ በረራ ዝጅምር መገዲ ኣየር ኢትዮጵያ÷ ንተሳፈርቲ ተወሳኪ መማረፂታትን ንምቕራብ ዘለዎ ቆራፅነት ዘርእይ ምኳኑ ኣብ ከተማ ማንቸስተር ማናጀር መሸጣ እቲ መገዲ ኣየር ኣንተነህ ፍቃዱ ተዛሪቦም፡፡

እቲ መገዲ ኣየር ኣብ ሰሙን ሓሙሽተ መዓልቲታት በረራ ዘካይድ ኣብ ዝነበረሉ እዋን በረራ መገደኛታት ከም ኣቆፃፅራ ኣዉሮፓዉያን 2024 ልዕሊ 35 ሺሕ ተጉዓዝቲ ከተኣናግድ ከምዝኸኣለ ተገሊፁ፡፡

ሓላፊ ዘፈር ንግዲ መዕርፎ ነፈርቲ ማንቸስተር ስቲፈን ተርነር ብወገኖም÷ “እቲ መገዲ ኣየር ዕለታዊ በረራ ምጅማሩ ንዓማዊልና ፅቡቕ ኣጋጣሚ ኢዩ” ምባሎም ሚዲያ ሴንተር እቲ መገዲ ኣየር ኣብ ዘውፅኦ ፀብፃብ ይሕብር፡፡