ቀዳማይ ሚኒስትር ኣቢይ(ዶ/ር) ኣብ ፋብሪካ ጥይት ሆሚቾ ዑደት ኣብ ዝገበርሉ እዋን ካብ መንጎ ዘልዓልዎም ቀንዲ ቀንዲ ነጥብታት

ኣዲስ ኣበባ፣ 27 ለካቲት፣ 2017 (ኤፍ ኤም ሲ)ኣብ ኢትዮጵያ ቅድሚ ሐዚ ኣብ ውሽጢ ዓዲ ተተኳሲ ጠያይቲ ናይ ምፍራይ ፈተነታት እንተነበሩ እውን ክሳብ ሎሚ ቅድሚ ሰለስተ ዓመት ሃገርና ካብ ወፃኢ ብምእታው ተደሪኻ ፀኒሓ ኢያ።

ኣብዚ ሐዚ እዋን ግን ኢትዮጵያ ኣብ ውሽጢ ዓዲ ተተኳሲ ካብ ምፍራሕ ሓሊፉ ናብ ወፃኢ ናይ ምልኣኽ ዓቕሚ ኣማዕቢላ ኢያ።

ኢትዮጵያ ዓባይ ሃገር ኢያ፤ ብመጠና፣ ብታሪኻን ሃፍታን ልክዕ ንባዕላ ሓሊያ ንደቃ ክተሳግር ምኽኣላ ምርግጋፅ የድሊ።

ቅድመ ሐዚ ኣብ ወሽጢ ኢትዮጵያ ብዝተወሰነ ደረጃ ጥይት ናይ ምፍራይ ፈተነታት ነይሮም፤ ኢትዮጵያ ከምዚ ዓይነት ስትራቴጂክ ዓቕሚታት እንተዘይሃኒፃ ኣብ ዝኾነ እዋን ዝኾነ መፂኡ መጥቃዕቲ ክፍፅመላ ይኽእል ኢዩ ዝብል ገምጋም ነይሩ።

ኣብ 2014 ዓ.ም ጥይት ንዕድግ ነይርና፤ ይኹን እንበር ኣብ 2015 ዓ.ም እቲ ፋብሪካ ምትካል ጀሚርና ኣብዚ ሐዚ እዋን በፂሕናዮ ንዘለና ብርኪ በፂሕና ኣለና።

ሎሚ ኢትዮጵያ ክላሽ፣ ብሬን፣ ስናይፐር፣ ዲሽቃ፣ ታንኪ፣ ኩሉ ዓይነት መዳፍዕ ካብ ባዕላ ሓሊፉ ንዕዳጋ ብእኹል ኩነታት ናይ ምቕራብ ዓቕሚ ሃኒፃ ኣላ፤ እቲ ፋብሪካ ዘበናዊን ኣብ ሰዓት ኣዝዩ ልዑል ናይ ምፍራይ ዓቕሚን ኣለዎ።

ሓፈሻዊ ቀፅሪን ዓቕሚ ምፍራይን እቲ ፋብሪካ ንኢትዮጵያ ዝምጥን ኢዩ። ሃገርና ከምዚ ዓይነት ዓቕሚ እንትህልዋ ምርኣይ ኣዝዩ ደስ ዝብል ኢዩ።

ክላሽን ስናይፐርን ሓዊሱ ካልኦት ኣፅዋራት ነፍሪ ኢና፤ ከምዚ ዓይነት ነገራት ካብ ምዕዳግ ወፂእና ንሃገራት ንምሻጥ ብምብቃዕናን ክልተ ዓመት ኣብ ዘይመልአ ጊዘ እዚ ዓቕሚ ተሃኒፁ ብምርኣየይ ልዑል ክብሪን ሓጎስን ተሰሚዑኒ።

ወተሃደር ኢየ ይርደአኒ ኢዩ። ኣብ ውትህድርና ከባቢ ዝጎድሉ ነገራት ኣብ እዋን ኦፕሬሽን ከመይ ኣፀጋሚ ከምዝኾነ እግንዘብ ኢየ።

ኣብዚ ሐዚ እዋን ኢትዮጵያ ስግኣት ኣይብላን፤ ኣእምሮ ዘለዎም ውላድ ኣለውዋ፤ ጀጋኑ ወተሃደራት ኣለውዋ፤ ብመንፅር እታዎት እውን ዝነበራ ውሱንነት ብዝተኽኣለ መጠን ፈቲሓ ኢያ።

ንወተሃደር ዝኸውን ክዳን፣ ጫማ፣ ጥይት፣ ክላሽ፣ ስናይፐር ካብ ወፃኢ ነእቲ ነይርና፤ ሐዚ ብብርኪ ሃገር ጥራሕ እንተይኮነስ እቲ ክዳን ሰራዊት ምክልኻል የፍሪ ኢዩ፤ ጫማ ኣፍሪዩ ዝጎደሎ ካብ ኢንዱስትሪታት ውሽጢ ዓዲ ይቕበል።

ኢትዮጵያ ንብዙሓት ሃገራት ጥይት ንምቕራብ ዘኽእል ስምምዕነት ፈፂማ ኣላ።

ኣብ ውሽጢ ሰለስተ ኣዋርሕ ጥራሕ ልዕሊ 30 ሚሊየን ዶላር ሽይጣት ፈፂምና ኢና፤ እዚ ድማ ምፍራይን ምሻጥን እንትንክእል ዝተረኸበ ውፅኢት ኢዩ።

ብወተሃደራዊ ዓቕሚ ዝተባባዕ ውፅኢት ይምዝገብ ኣሎ፤ ብፍላይ ኣብዚ ዓመት ልዑል ጠመተ ካብ ዝተውሃቦም ሴክተራት ሓደ ኢንዱስትሪ ኢዩ።

ናይ ምክልኻል ኢንዱስትሪ ጥራሕ ዘምፀኦ ምዕባለ ኣዝዩ ተስፋ ወሃቢን ኢትዮጵያ ብሓቂ ትምዕብል ከምዘላን ዘርእይ ኢዩ።

እቲ ፋብሪካ ጥይት ኢትዮጵያ ካብ ስግኣት ወፂኣ መሰረታዊ ዝበሃሉ ፍሪያታት ኣፍሪያ ንባዕላ ንምክልኻል ኢሉ ‘ውን ንምምዕባል ዘኽእል ዓቕሚ ትፈጥር ኣላ ዝብል ብዝግባእ ዘርእይ ኢዩ።

ሃገር ኩሉ ግዘ ምፍራይ ዝግበኣ ሰለስተ መሰረታዊ ጉዳያት ኣለዉ። ንሳቶም እውን፦ ምግቢ፣ ክዳንን መድሓኒትን ኢዮም። ነዚኣቶም ብእኹል ዘይተፍሪ ሃገር ንዝኾነ ይኹን ሓደጋ ትቃላዕ ኢያ።

ኣብ ኩሉ ዓውዲ እንትርእይ ኣዝዩ ፀገም ዝነበረ፤ ብቐሊሉ ክነማልኦም ዝነበርና ነገራት ምላሽ ይረኽቡ ኣለዉ፤ ብመሰረት እዚ ኢትዮጵያ ተስፋ ኣለዋ፣ ኢትዮጵያ ትብርኽ ኣላ፤ ኢትዮጵያ ጀሚራ ትኽንብት ኣላ።

ኣብ ውሽጢ ዓደ ዓመትን ፈረቓንን ክልተ ዓመትን ከምዚ ዓይነት ናይ ባዕልኻ ድልየት ሸፊንካ ንዕዳጋ ወፃኢ ምቕራብ ዘኽእል ኢንዱስትሪ ምርኣይ ኣዝዩ ዓብዪ ክብሪን ኩርዓትን ኢዩ።

ነዚ ስራሕ ኣመራርሓ ሚኒስቴር ምክልኻል፣ ሓላፍቲ ኢንዱስትሪ፣ ብኣሽሓት ዝቑፀሩ ሰራሕተኛታት እቲ ከባቢ ልዑል ክብሪን ምስጋናን ይግበኦም። ኣብ ውሽጢ ሓፂር እዋን ኢትዮጵያ ዘድሊያ ዓቕሚ ፈጢሮም ኢዮም፤ ዓዲጎም እንተይኮነስ ኣፍሪዮም። ንኣና ጥራሕ ዘይኮነስ ንካልኦት ዝሽየጥ ዓቕሚ ሃኒፅና ኣለና። ነዚ ድማ ኩርዓትን ክብሪን ክስምዖም ይግባእ። ኣነ እውን ኣዝየ አመስግኖም፤ ደስ ዝብል ውፅኢት ኢና ርእይና።

በረትዑ ይቐፅል፤ ደው ከይብል፤ ኢትዮጵያ ካብዚ ንዓቐብ ስለዝግበኣ ምዕጋብ ዘይኮነስ ብዙሕ ምድላይ ይግባእ፤ ሰራሕተኛታት ንክመራመሩ ንክሰርሑ ትፅቢት ይግበር ክብሉ ቀዳማይ ሚኒስትር ኣቢይ ኣሕመድ(ዶ/ር) መልእኽቶም ኣመሓላሊፎም።

ብዮሐንስ ደርበው