ቢሮ ጥዕና  ብኣስታት 10 ሚሊየን ብር ዝተዓደጉ ሓገዝ ናውቲ ጥዕናን ተረኪቡ

ኣዲስ ኣበባ፣ 17 ጥሪ፣ 2017 (ኤፍ ኤም ሲ)ቢሮ ጥዕና ግዚያዊ ምምሕዳር ክልል ትግራይ፥ ፀገም ትካላት ጥዕና ንምፍታሕ ዑዙዝ ግደ ዘለዎ ብኣስታት 10 ሚሊየን ብር ዝተዓደገ ሓገዝ ናውቲ ጥዕናን ኣፋውስን ካብ ትካል መድሕን ህጻናት(Save the children) ተረኪቡ።

መተሓባባሪ ሪፍርም ጥዕና ትካላትን ግልጋሎት ጥዕናን እቲ ቢሮ ኣይተ መዓሾ ፍሰሃ፥ እቲ ግልጋሎት ዝቐርበለን ኣብ ወረዳታት ዓዴት፣ ኣሕሰኣ፣ ላዕላይ ማይጨው፣ ታሕታይ ማይጨው፣ ራማ ዓዲ ኣርባዕተን ኣበርገለ የጭላን ንዝርከባ ትካላት ጥዕና ከምዝኾነ ገሊፆም።

ዝነበረን ሕፅረት ናውቲ ጥዕናን ኣፋውስን ዝፈትሕ ደገፍ ምዃኑ ብምሕባር ነቲ ዝተገበረ ሓገዝ ብምምስጋን፥ እቲ ሓገዝ ተጠናኺሩ ንክቕፅል ፃውዒት ኣቕሪቦም።

መተሓባበሪት ጥዕና፣ ስነ መዓዛን ዋሽን ትካል መድሕን ህፃናት ጨንፈር ትግራይ ለንደን ሕሉፍ፥ ትካል መድሕን ህጻናት ካብ ፋውንዴሽን ቢል እና ሜሊንዳ ጌትስን ትካል ሰብኣዊ ሓገዝ ውድብ ሕብራት ሃገራት (UNOCHA)ን ብዝረኸቦ ሓገዝ ኣስታት 10 ሚሊየን ብር ዝዋግኦም ናውቲ ጥዕናን ኣፋውስን እዩ ኢለን።