ብብርኪ ክልል ኣብ ከተማ ማይጨዉ ዝኽበር በዓል ጥምቀት ሃይማኖታዊን ባህላዊን ትሕዝቶኡ ሓሊዩ ንክኽበር ምድላዋት ከምዝተወገነ ተገሊፁ

ኣዲስ ኣበባ፣ 9 ጥሪ፣ 2017 (ኤፍ ኤም ሲ)ብብርኪ ክልል ኣብ ከተማ ማይጨዉ ዝኽበር በዓል ጥምቀት ሃይማኖታዊን ባህላዊን ትሕዝቶኡ ሓሊዩ ብዝለዓለ ድምቀት ንክኽበር ምድላዋት ከም ዝተወገነ ዓብዪ ኮሚቴ በዓል ጥምቀት ኣፍሊጡ፡፡

ሓላፊ ቤት ፅሕፈት ትልምን ፋይናንስ እታ ከተማን ኣካቢ ዓብይ ኮሚቴ ጥምቀትን ዝኾኑ መ/ር የዉሃንስ ልኡል÷ “በዓል ጥምቀት ብብርኪ ክልል ኣብ ከተማና ንክኽበር ቅድም ኢሉ ዓብይ ኮሚቴ ዝተጣየሸ ኾይኑ ዛጊድ ብርክት ዝበሉ ስራሕቲ ተወጊኖም ኣለዉ” ኢሎም።

መ/ር የውሃንስ መጸዋዕታ እቲ ዓብይ ኮሚቴ ጥምቀት ብምቕባል ሓገዝ ንዝገበሩ ኣካላትን ትካላትን ብምምስጋን ካልኦት እውን ነቲ ሰናይ ተግባር ክስዕብዎ ፀዊዖም።

ኣብ ከተማ ማይጨው ይስራሕ ዘሎ ናይ 8 ኪሎ ሜትር መንገዲ ኣስፋልቲ ሓገዝ ዝዉዕል ቴሌቶን እውን ከምዝካየድ ምግላፆም ሓበሬታ ጉዳያት ኮሚዩኒኬሽን ከተማ ማይጨዉ የመላኽት ።