ቻይና ምስ ኢትዮጵያ ዘለዋ ሽርክና ቀፃልነት ብዘለዎ ምትሕብባር ምጥንኻር ከምዝግባእ ኣፍሊጣ

ኣዲስ ኣበባ፣ 10 ታሕሳስ፣ 2017 (ኤፍ ኤም ሲ)ቻይና ምስ ኢትዮጵያ ዘለዋ ሽርክና ቀፃልነት ብዘለዎ ምትሕብባር ምጥንኻር ከምዝግባእ ፍሉይ ልኡኽ ቻይና ኣብ ቀርኒ ኣፍሪካ ዡ ቢንግ ገሊፆም።

ሚኒስትር ጉዳያት ወፃኢ ጌዲዮን ጢሞቲዎስ (ዶ/ር) መስቶም ፍሉይ ልኡኽ ኣብ ከልቲኣዊ፣ ኣህጉራዊን ዓለም ለኻዊን ዛዕባታት ጠመተ ዝገበረ ዘተ ኣሳሊጦም።

ጌዲዮን (ዶ/ር)፥ ክልቲኣዊ ስትራቴጂካዊ ሽርክና ኢትዮ-ቻይና ፅኑዕን ዘይናጋዕን ኢዩ ክብሉ ኣብቲ ዘተ ገሊፆም።

ኢትዮጵያ ቀጣናዊ ሰላምን ምርግጋዕን ንምንጋስ ኣብ እትገብሮ ምንቅስቓስ ቻይና ቀፃልነት ዘለዎ ደገፍ ንክትገብር ምሕታቶም ኣብቲ ሚኒስቴር ዝረኸብናዮ ሓበሬታ የረድእ።

ኣምባሳደር ዙ ቢንግ ብግደኦም፥ ኣብ መንጎ ክልቲአን ሃገራት ዘሎ ርከብ ልዑል ብርኪ መብፅሑ ተዛሪቦም።

እቲ ሽርክና ቀፃልነት ብዘለዎ ምትሕብባር ኣብ ምጥንኻር ልዑል ግደ ከምዘለዎ እውን ገሊፆም።