ንምዕባለ መሰረት ዝኾነ ሰላም ምሕላው ሓበራዊ ሓላፍነት ኢዩ – ፓርቲ ብልፅግና
ኣዲስ ኣበባ፣ 19 ለካቲት፣ 2017 (ኤፍ ኤም ሲ)ንምዕባለ መሰረት ዝኾነ ክብሪ ሰላም ምሕላው ሓበራዊ ሓላፍነት ከምዝኾነ ፓርቲ ብልፅግና ኣገንዚቡ፡፡
እቲ ፓርቲ “ንሰላም ኩልና ኣብዚሕና ንደልዮ ኢና፤ ንምዕባለ መሰረት ዝኾነ ክብሪ ሰላም ምሕላው ኢሉ እውን ንዘላቒ ሰላም ብሓባር ጠጠው ምባል ሓበራዊ ሓላፍነት ኢዩ” ኢሉ፡፡
ፓርቲ ብልፅግና ኣብ ማሕበራዊ ሚዲያ ገፁ ዘካፈሎ ሙሉእ ሓበሬታ ከምዚ ዝስዕብ ቀሪቡ ኣሎ፡-
ሰላም ኣብዚሕና ንደሊ!
ሓንቲ ሃገር ቀፃሊ ዝኾነ ጭቤት ንኽተመዝግብን ዕለታዊ ናብራ ህዝቢታትን ንምልዋጥ ሰላም መሰረታዊ ነገር ኢዩ። ብብርኪ ውልቀሰብ እውን እንተኾነ ሰላም እንድሕር ዘይሃሊዩ ወፂእኻ ምእታው፤ ሰሪሕኻ ምብላዕ፤ ወሊድካ ምስዓም ኣይከኣልን፡፡
ሰላም ንወዲሰብ ጥራሕ ዘይኮነስ ንእንሰሳት፣ ንእንሰሳ ዘገዳም፣ ንእፅዋት፣ ዱርን ገደሉን፣ ንሩባታትን ወሓዝቲን ኣዚዩ ኣድላዪ ኢዩ።
ብኣንፃሩ ድማ ኲናት መዕነዊ፣ ኲናት ቀታሊ፣ ሃገር ዘፍርስ፣ ዜጋታት ሃገር ኣልቦ ይገብር፣ ድኽነትን ድሕረትን የስፍሕ። ናይ ኲናት ፅቡቕ ናይ ሰላም ሕማቕ የለን። ነዚ ኢዩ ድማ ንሰላም ኣብዚሕና እንደልያ።
መሰረታዊ ድሌት ዜጋታት ሰላም፤ ልምዓት፤ ናፅነትን ዴሞክራሲ ኢዩ። ነዚ ድማ ኢዩ ፓርቲ ብልፅግና ሰላም፤ ሰላም፤ ሰላም ንኢትዮጵያ፤ ሰላም ንዜጋታታ፤ ሰላም ንኣፍሪካ፤ ሰላም ንዓለም እናበለ በቢመድረኹ ኣብዚሑ ዝሰብኸ።
ነዚ እዩ ድማ ንሰላማዊ ቃልሲ እምቢ ብምባል ዕጥቂ ተሓንጊጦም ዝሸፈቱ ሓይሊታት እንተይተረፈ ክሳብ ሎሚ ኢድና ዘርጊሕና ደጋዲምና ፃውዒት ሰላም እነመሓላልፍ። ከም ፓርቲ ኣማራፂ ሰላም እነቐድም ህዝብና ጨና ባሩድ ዘይኮነስ ናይ ሰላም ኣየር ክትንፍስ ኣለዎ፤ ንህዝብና ልምዓት ይግበኦ፤ ህዝብና ናይ ለዉጢ ትሩፋት ተቛዳሲ ክኸውን ከምዘለዎ ስለእነኣምን ኢዩ፡፡
ፓርቲ ብልፅግና ንሰላም ዘለዎ ቆራፅነት ብብዙሕ ተግባራት ዝግለፅ ኢዩ፤ ኣብ ኲናት ሰሜን ዝዓነዋ ትካላት፤ መሰረተ ልምዓታትን እቲ ክልል መሊስካ እግሪ ንምትካልን ብበጀት ይኹን ብካልኦት ናውቲታት መላእ ኢትዮጵያዊያን ብምትሕብባር ዝተጓዓዝናዮ ርሕቐት ንሰላም ዘለና ቆራፅነት ንዓለም ዘርአየ ኢዩ።
ፓርቲና ኣብ ካልኣይ ስሩዕ ጉባኤ ዝተጀመረ መካተቲ ሃገራዊ ዘተ ብዓወት ብምዝዛም ናይ ኢትዮጵያን ናይ ዘበናት ማሕለኻ ፖለቲካ ንኽዕፆ፤ ኣፈላላይን ጎንፂታትን ኣተሓሕዛና ኣብ ዘላቒ መፍትሒ መገዲታት ንኽሕንፅፅ፤ ንተግባራዊነትን ዓወትን ዝተጀመረ ፕሮግራም ስግግር ፍትሒ ፅቢት ዝግበረሉ ሓላፍነት ብብቕዓት ንምውፃእ፤ እወንታዊ ዘላቒ ሰላምና እናተኣጓጎሉ ምስ ዝርከቡ ዕጡቓት ሓይሊታት ዝግበር ዘተን ድርድርን ተጠናኺሩ ንኽቕፅል ኣንፈት ምቕማጡ እውን ንሰላም ዘለና ቆራፅነት ዘርኢ ኢዩ።
ኢትዮጵያ ብብዙሓት ፀጋታት ዝተመልአት ከምኡ እውን በዓልቲ ፀጋ ዕድመ ሃገር ኮይና እናሃለወት ኣብ ዝተፈላለዩ እዋናት ባናይ ወፃኢ ፀላእቲን ባናይ ዉሽጢ ባንዳታትን ሰላማ ስኢና ፀጋታታ ተጠቒማ ናብ ብራኸ ብልፅግና ክትወፅእ ኣይከኣለትን።
እዞም ምኽንያታት ክሳብ ሎሚ ንኢትዮጵያ እናፈተኑ ይረኸቡ እምበር ናይ ትማሊ ኣቦታትና ብቋንቋ፤ ብባህሊ፤ ብሃይማኖት፤ ብብሄር እንተይተፈላለዩ ሓደ ብምዃን ንወራሪ ፋሺስት ጣሊያንን ናይ ውሽጢ ባንዳን ተዋጊኦም ዓወት ፀለምቲ ህዝቢታት ዝኾነ ዓወት ዓድዋ ብምስዓር ንዓለም ከምዘደመሙ ንሕና እውን ደቂ ኣቦታትና ስለዝኾንና ህብረ ብሄራዊ ሓድነትና ኣጠናኺርና ኢትዮጵያን ህዝባን ዘጋጥሙዎም ፈተናታት ኩሎም ብዓወት ብምስጋር ናብ ብራኸ ምዕባለ ምውፃእና ኣይተርፍን።
ሰላም ንኹልና ኣብዚሕና ንደሊ፤ ንምዕባለ መሰረት ዝኾነ ክብሪ ሰላም ምሕላው ኢሉ እውን ንዘላቒ ሰላም ብሓባር ጠጠው ምባል ድማ ናይ ኩሉ ሓላፍነት ኢዩ፡፡