ንጎረባቲ ሃገራት ካብ ዝቐረበ መሸጣ ሓይሊ ኤሌክትሪክ ልዕሊ 61 ሚሊዮን ዶላር ኣታዊ ተረኪቡ

ኣዲስ ኣበባ፣ 25 ለካቲት፣ 2017 (ኤፍ ኤም ሲ) ኣብ ዝሓለፉ 6 ኣዋርሕ ንጎረባብቲ ሃገራት ካብ ዝቐረበ መሸጣ ሓይሊ ኤሌክትሪክ ልዕሊ 61 ሚሊዮን ዶላር ኣታዊ ምርካቡ ሓይሊ ኤሌክትሪክ ኢትዮጵያ ኣፍሊጡ፡፡

ዳይሬክተር ኮሙኒኬሽን እቲ ትካል ሞገስ መኮንን ንዲጂታል ፋና ከምዝገለፅዎ፥ ኣብ ስራሕቲ ምፍልፋል ሓይሊ ጠመተ ሂቡ ብምስራሕ ንውሽጢ ሃገርን ወፃኢ ሃገራትን ሓይሊ ኤሌክትሪክ ንምቕራብ ኣብ ምስራሕ ይርከብ፡፡

ኣብ መንፈቕ ዓመት 11 ሺሕን 686 ጊጋ ዋት ኣብ ሰዓት ሓይሊ ኤሌክትሪክ ንምፍልፋል ተተሊሙ 13 ሺሕን 504 ጊጋ ዋት ምፍልፋል ከምዝተኽኣለ ሓቢሮም፡፡

ካብ ዝፈረየ ሓይሊ ውሽጢ፤ ንጅቡቲ 274 ነጥቢ 2 ጊጋ ዋት ኣብ ሰዓት ሓይሊ ኤሌክትሪክ ብምቕራብ 17 ነጥቢ 16 ሚሊየን ዶላር ከምዝተረኸበ ገሊፆም፡፡

ብተወሳኪ ንኬንያ 654 ነጥቢ 9 ጊጋ ዋት ኣብ ሰዓት ከምኡዉን ንሱዳን 26 ነጥቢ 6 ጊጋ ዋት ኣብ ሰዓት ሓይሊ ኤሌክትሪክ ምቕራብ ምኽኣሉ ኣረዲኦም፡፡

ንሰለስቲአን ሃገራት ካብ ዝቐረበ መሸጣ ሓይሊ ኤሌክትሪክ ልዕሊ 61 ነጥቢ 07 ሚሊየን ዶላር ከምዝተረኸበ እቶም ዳይሬክተር ሓቢሮም፡፡

ብመላኩ ገድፍ