ኣብቲ ጉባኤ ዝተቐመጡ ኣንፈታት ንምፍፃም ብቖራፅነት ምስራሕ ይግባእ – ኣይተ ኣደም ፋራህ

ኣዲስ ኣበባ፣ 26 ጥሪ፣ 2017 (ኤፍ ኤም ሲ)ኣብ ካልኣይ ስሩዕ ጉባኤ ፓርቲ ብልፅግና ዝተቐመጡ ኣንፈታት ብዕዉትነት ብምፍፃም ኩለመዳያዊ ጉዕዞ ምዕባ ሃገርና ንምቅልጣፍ ኩልና ብቖራፅነት ክንሰርሕ ይግባእ ክብሉ ምክትል ፕሬዚዳንት ፓርቲ ብልፅግና ኣደም ፋራህ ኣተሓሳሲቦም።

ካልኣይ ስሩዕ ጉባኤ ፓርቲ ብልፅግና ‹‹ካብ ቃል ክሳብ ባህሊ›› ብዝብል መሪሕ ቃል ካብ 23 ክሳብ 25 ጥሪ 2017 ዓ.ም ከምዝተኻየደ ይፍለጥ፡፡

ምክትል ፕሬዚዳንት ፓርቲ ብልፅግና ኣደም ፋራህ ኣብ ማሕበራዊ ሚዲያ ገፆም÷ “2ይ ስሩዕ ጉባኤ ፓርቲ ብልፅግና ብድምቀትን ዕላማኡ ብዘዕወተ መልክዑን ብምዝዛሙ እንኳዕ ደስ በለና እንኳዕ ደስ በለኩም” ኢሎም።

ነቲ ፓርቲ ይኹን ንኢትዮጵያ ብዝምጥን ክብ ብዝበለ ደረጃ ዝተሰናደአ እቲ ጉባኤ ዕዉት ንኽኸውን ኣስተዋፅኦ ንዝገበሩ ኣካላት እውን ምስጋናይ ኣቕሪቦም።

እቲ ጉባኤ ኣብ ቀዳማይ ስሩዕ ጉባኤ እቲ ፓርቲ ዝተቐመጡ ኣንፈታት ኣፈፃፅምኡ ብዕምቆት ዝተገመገሙሉ፣ መተሓዳደሪ ደምቢ ፓርቲና ዝተመሓየሸሉ፣ ብመሰረት ኣሰራርሓና ናፃ፣ ፍትሓዊን ዴሞክራሲያዊን ብዝኾነ መገዲ ኣመራርሓ ኣካላት ዝተመረፁሉን ክሳብ ሕዚ ዝነበሩ ዓወታት ናብ ዝለዓለ ደረጃ ዘብፅሑ ኣንፈታት ዝተቐመጡሉ ከምዝነበረ ኣልዒሎም።

“ብምዃኑ ድማ ኣብቲ ጉባኤ ዝተቐመጡ ኣንፈታት ብውፅኢታዊነት ብምፍፃም ኩለመዳያዊ ምዕባለ ሃገርና ናይ ምርግጋፅ ጉዕዞ ንኽነቀላጥፍ ኩልና ብቖራፅነት ክንሰርሕ ፃውዒተይ የቅርብ” ክብሉ ፀዊዖም።