ኣብ ትግራይ ን30 ሽሕ ህፃናት ተረባሕቲ ዝገብር ፕሮጀክት ምብሳር ምግብና ተምሃሮ ዕላዊ ኮይኑ

ኣዲስ ኣበባ፣ 20 ጥሪ፣ 2017 (ኤፍ ኤም ሲ)ኣብ ሸሞንተ ከተማታት ክልል ትግራይ ን30 ሽሕ ህፃናት ተረባሕቲ ዝገብር ፕሮጀክት ምብሳር ምግብና ተምሃሮ ሎሚ ዕላዊ ኮይኑ።

እቲ ፕሮጀክት ፃባን ርግኦን ዝተሓወሶ ሃናፃይ ምግቢ ንህፃናት ተምሃሮ ዝወሃበሉ አንትኸውን፥ ማሕበር ልምዓት ትግራይ ምስ ልምዓት ኔይዘርላንድ(SNV) ብምትሕብባር ተግባራዊ ዝገበሮ ከምዝኾነ ተገሊፁ።

“ስኩል ሚልክ ፕሮግራም” ዝብል ስያመ ዝሓዘ ሓድሽ ፕሮጀክት ከምዝኾነ እውን ተሓቢሩ።

ኣብ ሙሉእ ቀዳማይ ብርኪ ቤት ትምህርቲ ሃፃይ ዮሃንስ ራብዓይ መቐለ ዕላዊ ኣብ ዝኾነ ፕሮጀክት፥ ላዕለዎት ኣመራርሓ ጊዝያዊ ምምሕዳር ክልል ትግራይ፣ ላዕለዎት ኣመራርሓ ማልት፣ ትካል ልምዓት ኔይዘርላንድ(SNV)፣ ኣመራርሓ ቢሮ ትምህርቲ ግዚያዊ ምምሕዳር ክልል ትግራይን ካልኦት ዝምልከቶም ኣካላትን ተረኺቦም።

ኣብቲ ምጅማር ምግብና ህፃናት ዝተረኸቡ ፈፃሚ ዳይሬክተር ማሕበር ልምዓት ትግራይ ኣይተ ተስፋይ ገብረእግዚአብሄር፥ ብሰንኪ እቲ ዝነበረ ኲናት ብርክት ዝበሉ ህፃናት ብምኽንያት ስእነት ምግቢ፣ ዕንወት ኣብያተ ትምህርቲ ካብ ማእዲ ትምህርቶም ሪሒቖም ከምዝፀንሑ ኣዘኻኺሮም።

ስለዝኾነ ማሕበር ልምዓት ትግራይ ምስ መዳርግቲ ኣካላት ብምዃን ኣብያተ ትምህርቲ ናብ ንቡር ንምምላስ ብእትገብሮ ዘላ ዘይሕለል ፃዕሪ ዝነበሩ ፀገማት ብውስን መልክዑ ኣብ  ምቕራፍ ከምዝርከብ ሓቢሮም።

ናይዚ መረእያ ድማ ቅድሚ ሓደ ዓመት ኣብ ከተማ ሽረ እንዳስላሰ ዝጀመረ ቀረብ ምግቢ ንተምሃሮ ኣብ ኣብያተ ትምህርቲ ተጠናኺሩ ብምቕፃሉ ሐዚ ድማ ንልዕሊ 30 ሽሕ ህፃናት ተምሃሮ ንክበፅሕ ከምዝተኻለ ምግላፆም ኣብ ጉዳያት ኮሚኒኬሽን እቲ ክልል ዝረኸብናዮ ሓበሬታ የረድእ።