ኣብ ትግራይ ኣብ ዓውዲ ጥዕና ዘጋጠሙ ዕንወታት መፍትሕታት ንምንዳይ ዝዓለመ ዓለም ለኸ ዓውደ መፅናዕቲ ይሳለጥ ኣሎ

ኣዲስ ኣበባ፣ 25 መጋቢት፣ 2017 (ኤፍ ኤም ሲ)ኣብ ዓውዲ ጥዕና ክልል ትግራይ ዘጋጠሙ ዕንወታት ብመፅናዕቲ ዝተደገፈ መፍትሕታት ንምንዳይ ዝዓለመ ዓስራይ ዓለም ለኸ ዓውደ መፅናዕቲ ይሳለጥ ኣሎ።

እቲ ዋዕላ፥ ብምትሕብባር ኢንስቲትዩት ምርምር ጥዕና ትግራይ፣ ቢሮ ጥዕና ግዚያዊ ምምሕዳር ክልል ትግራይን ኢስማስን ኢዩ ዝሳለጥ ዘሎ።

ኣብቲ ዓውዲ መፅናዕቲ ኣብ ጉዳይ ኤች ኣይቪ ኤድስ፣ ደም ልገሳን ተመሓላፍቲ ሕማማትን ግልጋሎት ላባራቶርን ካልኦትን ዝድህስሱ መፅናዕትታት ቀሪቦምን ክዝተየሎም እዩ።

ሓላፊ ቢሮ ጥዕና ግዚያዊ ምምሕዳር እቲ ክልል ዶክተር ኣማንኤል ሃይለ፥ እቲ ዓውደ መፅናዕቲ ስርዓት ጥዕና ዘለሉ ኩነታት ዝድህስሱ መፅናዕትታት ዝቐርብሉ ምዃኑ ገሊፆም።

ክሳብ ሐዚ ዝተኻየዱ መፅናዕትታት ንተግባራዊ ስራሕ መሰረት ኮይኖም ይቕፅሉ ከምዘለው ብምሕባር፥ ዝተረኸበ ውፅኢት ልዑል በጀት ወፅዩሎም ዝካየዱ መፅናዕትታት ኣብ መረዳእታን መፅናዕትን መሰረት ዝገበረ ስራሕ ንምስራሕ ልዑል ግደ ከምዘለዎ ገሊፆም።

ንዝሓለፉ 10 ዓመታት ስርዓት ጥዕና ትግራይ ማእኸል ዝገበሩ መፅናዕትታት እናቐረቡን ንምምሕያሽ ዓውዲ ጥዕና ትግራይ ከም መሰረት ብምውሳድ እናተሰረሐ ከምዝመፀ ተሓቢሩ።

ዋና ዳይሬክተር ኢንስቲትዩት ምርምር ጥዕና ክልል ትግራይ ዶክተር ሓየሎም ካሕሳይ፥ እቶም ዝተኻየዱ መፅናዕትታት ናብ ተግባር ዝተለወጡ ምዃኖም ገሊፆም።

ዓለምለኸ ኢንስትትዩት ማሕበራዊ ሳይንስን ሜዲካል ስነ ሰብን ጣልያን (ኢስማስን )ወኪሎም ዝመፁ ፕሮፌሰር ኣልዶ ሞሮነ፥ ካብ መፅናዕታዊ ፅሑፋት ወፃእ ፀገም ጥዕና ትግራይ ምፍታሕ ኣፀጋሚ ምዃኑ ብምርዳእ ዝካየዱ መፅናዕትታት ተጠናኺሮም ክቕፅሉ ከምዝግባእ ኣመላኺቶም።