ኣገልግሎት ኣምቡላንስ ብነፈርቲ ክጅመር ኢዩ

ኣዲስ ኣበባ፣ 19 ጥሪ፣ 2017 (ኤፍ ኤም ሲ)ኣብ ኢትዮጵያ ኣገልግሎት ኣምቡላንስ ብነፈርቲ ንምጅማር ምድላው ይግበር ከምዘሎ ሚኒስቴር ጥዕና ኣፍሊጡ።

ኣብቲ ሚኒስቴር ኣፈፃሚ ስራሕ መሪሕ ኣገልግሎት ሕክምና ዶ/ር ኢሉባቦር ቡኖ ንፋና ሚዲያ ኮርፖሬሽን ከምዝበልዎ፥ እቲ ኣገልግሎት ንምጅማር ምድላው ዶክመንት ተገይሩ ኣሎ።

ንተግባራውነቱ፥ ሚኒስቴር ገንዘብ፣ ሓይሊ ኣየርን መገዲ ኣየር ኢትዮጵያን ደገፍ ይገብሩ ከምዘለዉን እቲ ከይዲ ኣብ ፅቡቕ ኩነታት ከምዝርከብን ተዛሪቦም።

ፈለማ ንሕክምና ውሽጢ ዓዲ ሓንቲ ሄሌኮፕተርን ንሕክምና ወፃኢ ዓዲ ድማ ሓንቲ ፊክስድ ዊንግ ኣምቡላንስ ነፋሪትን ንምዕዳግ ከምዝተተለመ ገሊፆም።

እታ ሄሊኮፕተር ኣብዚ ዓመት ተዓዲጋ ኣብ ዝቕፅል ዓመት ስራሕ ከምእትጅምር ኣብሪሆም።

እቲ ኣገልግሎት፥ ብጎንፂ፣ ሓደጋ ባርዕ ሓዊ፣ ዝተማልአ ኣገልግሎት ካብ ዝህባ ትካላት ጥዕና ብርሕቐት ዘለዋ ወይ እውን ብኻልኦት ምኽኒያታት ልዑል ሀንደበታዊ ሕክምና እንተኣድሊዩ ተሓከምቲ ብህፁፅ ናብ ትካላት ጥዕና ንምብፃሕ ከምዘኽእል ዶ/ር ኢሉባቦር ተዛሪቦም።

ብመሳፍንት እያዩ