እስራኤል ብዝፈፀመቶ ደብዳብ ኣየር ብውሑዱ 22 ሰባት ህይወት ሓሊፉ

ኣዲስ ኣበባ፣ 6 ታሕሳስ፣ 2017 (ኤፍ ኤም ሲ)እስራኤል ኣብ ጋዛ ብዝፈፀመቶ ደብዳብ ኣየር ብውሑዱ 22 ፍልስጤማውያን ከምዝሞቱ ተገሊፁ።

ኣብ ወሽመጥ ማእኸላዊ ጋዛ ከተማ ዲር ኣል ባላህ ጥቓ እንዳ ማዘጋጃ ዝርከ ህንፃ ብዝበፅሐ መጥቃዕቲ ብውሑዱ 10 ሰባት ከምዝተቐተሉ ሰብ ሞያ ሕክምና ኣረጋጊፆም።

በቲ መጥቃዕቲ ከንቲባ እታ ተማዋ ዝኾኑን ኣብ ማእኸላይ ጋዛ ሓላፊ ኮሚቴ ምምሕዳር ሃማስ ዝነበሩን ውልቀሰብ ከምዝተቐተሉ ሮይተርስ ፀብፂቡ።

ጦር እስራኤል እቶም ከንቲባ ዒላማ ናይቲ መጥቃዕቲ ከምዝነበሩ ብምግላፅ ወታደራት ሃማስ ይድግፉ ከምዝነበሩ ሓቢሩ።

ኣብቲ ከባቢ ብዝተፈፀመ ካሊእ መጥቃዕቲ ኣርባዕተ ተወሰኽቲ ሰባት ተቐቲሎም።

ካብዚ ብተወሳኺ ኣብ ዝተፈላለዩ ከባታት ወሽመጥ ብዝተፈፀመ መጥቃዕቲ ብውሑዱ ሸውዓተ ሰባት ከምዝሞቱ ሰብ ሞያ ፍልስጤም ገሊፆም።