ዘፈር ውልቀ ኣብ ቱሪዝም ንኽሳተፍ መንግስቲ ብትኹረት ይሰርሕ ኣሎ – ሰላማዊት ካሳ

ኣዲስ ኣበባ፣ 11 ለካቲት፣ 2017 (ኤፍ ኤም ሲ)ዘፈር ውልቀ ኣብ ቱሪዝም ንኽሳተፍ መንግስቲ ብትኹረት እናሰርሐ ከምዝርከብ ሚኒስትር ቱሪዝም ሰላማዊት ካሳ ገሊፀን፡፡

እተን ሚኒስትር ብሓላፊት ፕሬስ ሴክሬታሪያት ቤት ፅሕፈት ቀዳማይ ሚኒስትር ቢልለኔ ስዩም ኣሰናዳእነት ኣብ ዝቐርብ ”ኢትዮጵያ ኢን ፎከስ” ፃንሒት ዝገበራ እንትኾና፥ ብዛዕባ እዋናዊ ምንቅስቓስ ቱሪዝም ኢትዮጵያ ኣልዒለን፡፡

“ኢትዮጵያ ንበፃሕቲ ተመራፂት ካብ ዝገብራ ሓደን ዋናን ዝተፈላለዩ ባህሊታት፣ መባፅሕቲታት፣ ቦታታትን በፃሕቲ ዝስሕቡ መስሕባትን ምህላዎም ኢዩ” ኢለን፡፡

ዝኾነ ይኹን በፃሒ ናብ ኢትዮጵያ ብምምፃእ ብዝረኣዮ ነገር ዘይምሕጓስን ዘይምዝንጋዕን ኣይኽእልን ዝበላ እተን ሚኒስትር፥ ኢትዮጵያ ዝተፈላለዩ መስሕባት ዝርከቡላ ጥራሕ ዘይኮነት ምድረ-ቀደምት ምዃኗ ተመራፂት ከምዝገብራ ኣብሪሀን።

“ብዛዕባ ምድረ-ቀደምትነታ እንትለዓል ብዛዕባ ኣቆፃፅራ ዘበና፣ ብዛዕባ ፊደላ፣ ቡን ንዓለም ብምፍላጣ፣ ብባዕዳዊ ገዛእቲ ዘይምግዛኣን ካብ ካልኦት ብዝተፈለየ መልክዑ ስለዘልዕሉዋ ናይ ሃገር ሃፍቲ ኢዩ” ኢለን፡፡

ኣብ ዝሓለፉ ሽዱሽተ ዓመታት ንቱሪዝም ዝተፈለየ ትኹረት እናተውሃቦ ከምዝኾነ ብምልዓል፥ ቱሪዝም ምስ ላዕለዎት ፍልፍላት ኢኮኖሚ እታ ሃገር ሓደ ተገይሩ ብመንግስቲ ከምዝተወሰደ ገሊፀን፡፡

እዚ ድማ ቱሪዝም ኢትዮጵያ ካብ ምድንፋዕ ብተወሳኺ ዘፈር ውልቀ ኣብ ዓውዲ ቱሪዝም ንኽሳተፍ ዝገብር ከምዝኾነ፤ ቱሪዝም ኣብ ህንፀት ሃገር ዘሕድሮ ፅዕንቶ ቀሊል ዘይበሃል ከምዝኾነ እውን ኣልዒለን፡፡

ምስዚ ተተሓሒዙ መገዲ ኣየር ኢትዮጵያ ካብ ኣፍሪካ ሓሊፉ ኣብ ዓለም ተመራፂ ዝኾነ መገዲ ኣየር ከምዝኾነ ብምፅራሕ፥ እዚ ድማ ንቱሪዝም ልዑል ኣስተዋፅኦ እናበርከተ ከምዝርከብ ገሊፀን፡፡