ዳግመ ሕውየት ኣብያተ ትምህርቲ ትግራይ ንምርግጋፅ ዝገብሮ ሓገዝ ኣጠናኺሩ ከምዝቕፅል ሕብረት ኣውሮፓ ገሊፁ

ኣዲስ ኣበባ፣ 26 ለካቲት፣ 2017 (ኤፍ ኤም ሲ)ሕብረት ኣውሮፓ ዳግመ ሕውየትን ህንፀትን ኣብያተ ትምህርቲ ክልል ትግራይ ንምርግጋፅ ዝገብሮ ሓገዝ ኣጠናኺሩ ከምዝቕፅል ኣምባሳደር እቲ ሕብረት ኣብ ኢትዮጵያ ሶፌ ፍሮም ገሊፀን።

ሕብረት ኣውሮፓ ብዝተፈላለዩ ገበርቲ ሰናይ ትካላት ኣቢሉ ኣብ ዓውዲ ትምህርቲ ትግራይ ዝሰርሖም ፕሮጀክታት ሎሚ ዑደትን ስነ ስርዓት ምረቓን ኣሳሊጡ፡፡

ኣምባሳደር ሕብረት ኣውሮፓ ኣብ ኢትዮጵያ ሶፌ ፎሮም÷ እቲ ሕብረት ቅድሚ ኩናት ኣትሒዙ ብዝተፈላዩ ገበርቲ ሰናይ ትካላት ኣቢሉ ስራሕቲ መሰረተ ልምዓት እናሳለጠ ከምዝፀነሐ ኣብሪሀን።

እቲ ሕብረት ሕዚ እውን ኣብ ስራሕቲ ዳግመ ሕውየትን ህንፀትን ዓውዲ ትምህርቲ ትግራይ ዝገብሮ ዘሎ ስራሕቲ ኣበርቲዑ ከምዝቅፅለሉ ኣረጋጊፀን።

ሓላፊ ቢሮ ትምህርቲ ትግራይ ዶክተር ኪሮስ ጉዕሽ ብግደኦም÷ ገበርቲ ሰናይ ትካላት ብሰንኪ ኲናት ዝዓነዋ ትካላት ትምህርቲ ንምፅጋን ዝገብርዎ ዘለው ኩለመዳያዊ ሓገዛት ንኢዶም፡፡

ሕዚ እውን ዓውዲ ትምህርቲ እቲ ክልል ናብ ንቡር ንምምላስን ብፍልጠትን ብቅዓትን ዝደንፈዐን ዜጋ ንምፍራይ ዝግበር ፃዕሪ ንምዕዋት ኩሉ እጃሙ ከበርክት ፀዊዖም።