Fana: At a Speed of Life!

ድሕሪ ምትግባር ትካላዊ ሪፎርም ኣብ ምክልኻል ገበን ዓወታት ተመዝጊቦም ኢዮም – ኮሚሽነር ጀነራል ደመላሽ ገ/ሚካኤል

ኣዲስ ኣበባ፣ 10 መጋቢት፣ 2017 (ኤፍ ኤም ሲ)ድሕሪ ምትግባር ትካላዊ ሪፎርም ፖሊስ ፌዴራል ኣብ ዓውዲታት ምርመራን ምክልኻል ገበንን ዓወታት ተመዝጊቦም ኢዮም ክብሉ ኮሚሽነር ጀነራል ፖሊስ ፌዴራል ደመላሽ ገ/ሚካኤል ገሊፆም።

ኣብ ፖሊስ ፌዴራል ኢትዮጵያ ዝተወገኑ ስራሕቲ ሪፎርምን ብሓፈሻ ብህዝቢ ዝለዓሉ ሕቶታትን ብምድሃብ ኮሚሽነር ጀነራል ደመላሽ ገ/ሚካኤል ኣብ ዝሃቡዎ መብርሂ፤ ናፃ፣ ዘይሻራዊን ብቕዓት ዘለዎን ትካል ፖሊስ ምምስራቱ ሰላምን ድሕንነትን ንምርግጋፅ እናበርከቶ ዝርከብ ኣስተዋፅኦ ዕዙዝ ከምዝኾነ ተዛሪቦም።

ኣብ ዝሓለፉ ስርዓታት ፖሊስ ሓዊሱ ካልኦት ትካላት ፀፅታን ትካላዊ ናፅነትን ዘይሻራውነትን ቁመናኦም ኣብ ሕቶ ኣቲዩ ከምዝነበረ ኣዘኻኺሮም።

ድሕሪ ለውጢ ፖሊስ ነዚ ፀገም ንምፍታሕ ካብ ሓሳባዊ ለውጢ ጀሚሩ ዝወሰዶም ስጉምቲታት ሪፎርም እቲ ትካል ናፃን ዘይሻራዊን ከምዝገበሮ ገሊፆም።

ፖሊስ ካብ ፖለቲካ፣ ሃይማኖት፣ ዓሌትን ናይ ሌብነት ኔትወርክን ዝረሓቐ ብምዃን ሃገር ንምስጋር ብዘኽእል ቁመና ክጣየሽ ከምዝተገበረ ተዛሪቦም።

“ትካላዊ ሪፎርም ፖሊስ ፌዴራል ተግባራዊ ካብ ዝኸውን ንዳሓር ኣብታ ሃገር ገበን ኣብ ምክልኻልን ምርመራ ገበንን ወሰንቲ ዓወታት ተመዝጊቦም ኢዮም” ኢሎም።

ስራሕቲ ምርመራ ገበን ብቴክኖሎጂ ክድገፉ ምግባር ስለዝተኽኣለ ዕዉት ውፅኢታት ከምዝተመዝገቡ ብምሕባር፤ ዓበይቲ ዓለም ለኸ ኩነትን ህዝባዊን ሃይማኖታዊን በዓላትን ሓዊሱ ክፍነዉ ዝኽእሉ ተግባራት ራዕዲን ዝተወደቡ ፈተነታት ገበንን ኣቐዲምካ ምክልኻልን ምፍሻልን ከምዝተኽኣለ ሓቢሮም።

እዚ ውፅኢት ፖሊስ ብዝፈጠሮ ጥንኩር ዓቕሚ ተመዘገበ ከምዝኾነ ገሊፆም።

ፖሊስ ሰላም ላዕለዎት ትካላት ትምህርቲ እታ ሃገር ንኽረጋገፅ ከምኡ እውን መርሃ ግብሪታት ሃገር ለኸ ፈተናብዘይፀገም ክካየዱ ኣብ ምግባር ልዑል ግደ ከምዝተፃወተ ኣብሪሆም።

እቲ ትካል ሰብኣዊ መሰል ምኽባር ቁልፊ ክብሪታቱ ብምግባር ተልእኾኡን ሕገ መንግስታዊ ሓላፍነቱን እናተዋፀአ ከምዝኾነ ብምግላፅ፤ “ብሰብኣዊነት ምግልጋል” ኣብ ዝብል ኣምር ተመርኲሱ ኣብ ዝቐደሙ ስርዓታት ይለዓሉዎ ዝነበሩ ሕቶታት ጉዳይ ጥሕሰት ሰብኣዊ መሰል ምትራፍ ተኻኢሉ ኢዩ” ክብሉ ገሊፆም።

ሓልሓሊፉ እዚ ዓብዪ ፖሊሳዊ ክብሪ ዝጥሕሱ ኣባላት እንተጋጥሙ እቲ ትካል ስጉምቲ እርማት እናወሰደ ከምዘስተኻኽል ምግላፆም ጃብ ፓርቲ ብልፅግና ዝረኸብናዮ ሓበሬታ የመላኽት።

You might also like

Leave A Reply

Your email address will not be published.