ኣዲስ ኣበባ፣ 22 ለካቲት፣ 2017 (ኤፍ ኤም ሲ)ቀዳማይ ሚኒስትር ኣቢይ ኣሕመድ (ዶ/ር) መበል 129 በዓል ዓወት ዓድዋ ምኽንያት ብምግባር መልእኽቲ እንኳዕ ኣብፀሐኩም ኣመሓላሊፎም፡፡
እቶም ቀዳማይ ሚኒስትር ዘመሓላለፉዎ መልእኽቲ ሙሉእ ትሕዝቶኡ ከምዝስዕብ ቀሪቡ ኣሎ፡-
እንኳዕ ንመበል 129 በዓል ዓወት ዓድዋ ብሰላም ኣብፀሐኩም።
ዓድዋ ንሰላም ዝተገበረ ወፍሪ ኢዩ።
ቅድሚ ወፍሪ ዓድዋ ኢትዮጵያውያን ንሰላም ዘለዎም ፅኑዕ ቅዋም ደጋጊሞም ገሊፆም ኢዮም። ንሰላም ዘለዎም ቅዋም ፈኸራን ትንኮያን ፀላኢ ብትዕግስቲ ክሳብ ምሕፍ ዝበፅሐ ነይሩ።
ከምዝዝከር ወራሪ ጦር ኢጣልያ ባንዳ ይምልምል ነይሩ። ባንዳ የዕጥቕ ነይሩ። ተለኣኣኽቲ ባንዳ ኣብ ውሽጢ መንግስቲ ንምእታው ይፍትን ነይሩ። ራዕዲ ይነዝሕ ነይሩ። ንመንግስቲ ኢትዮጵያ ይኸስስ ነይሩ። ሓደ ሓደ ቦታታት ንመሓዝ ይፍትን ነይሩ። ኣብ ዓለም ለኸ መድረኽ ንኢትዮጵያ ንምንእኣስ ይፅዕር ነይሩ።
ኢትዮጵያ ነዚ ኩሉ ብትዕግስቲን ብምድላውን ትምልከቶ ነይራ።
ኢትዮጵያውያን ካብ ጥንቲ ጀሚሮም ኣብ ኲናት ነይሮም ኢዮም። በዚ ዝተበገሰ ሕማቕ ምስሊ ኵናት ይፈልጡዎ ኢዮም። ስለዝፈልጡዎ ድማ ብዝኸኣሉዎ ኣማራፂ ኩሉ ይርሕቑዎ። ንሰላማዊ ኣማራፂ ኣድላዪ ዘበለ ኩሉ ይገብሩ። ሓደ ሓደ ግዘ እውን ንሰላም ክብሉ ካብ ዘድሊ ንላዕሊ ይገብሩ። እዚ ኩሉ ደፊኡ ዝመፅአ ፀላኢ እንተጋጥሞም ግን ንሰላም ክብሉ ብምዝማት፤ ንሰላም ክብሉ ይዕወቱ።
ወፍሪ ዓድዋ እውን ከምዚ ኢዩ። ናይ ወራሪ ጦር ኢጣልያ ናብ ኲናት ከየኣቱ ተለሚኑ ኢዩ። ኣማራፂታት ሰላም ቀሪቦምሉ ኢዮም። “ኩርዓትን ትዕቢትን ዝመልኡዎ ርእሲ፣ ሰይፊን ጎራዴ ዝወቕዑዎ ክሳድ” ከምዝበሃል ኮነ። ናይ ኢትዮጵያ ትዕግስቲ ከም ፍርሓት፣ መገዲ ሰላም ኢትዮጵያ ከም ስዕረት ብምቑፃር።
ፀላእትና ኩሉ ግዘ ናይ ስልሂት ስሕተት ይሰርሑ። ትሕትናና፣ ትዕግስትናን ደላዪ ሰላም ምዃንናን የሰሓሕቶም። ወራሪ ጦር ኢጣልያ እውን ተሳሳተ። ኢትዮጵያውያን ግን እናተዓገስ እውን የሰናድኡ ነይሮም ኢዮም። ብኩሉ መዳይ ሰላሞም ንምሕላው ድሉዋት ነይሮም። ናፅነት ፣ ሉኣላዊነትን ክብሪን ዝርከቡ ሰላም ሃገር ብምሕላው ከምዝኾነ ይፈልጡ ኢዮም። ስለዚ ድማ ሰላሞም ብቅልፅሞም ንምሕላው ተሰናዲኦም።
ኲናት ዓድዋ ንሰላምን ንኲናትን ኣብ ሞንጎ ዝዋግኡ ሓይሊታት ዝተገበረ ኲናት ኢዩ። ሓደ ምስጢር ዓወትና እውን እዚ ኢዩ። ድሕሪ እቲ ኲናት ናብ በቐልን ፅልኢን ከይነምርሕ ዝገበረና እውን እዚ ኢዩ። ንሰላም ክንብል እምበር ንኲናት ስለዘይተዋጋእና።
ዓወት ዓድዋ ንክብሪታት ሉኣላዊነት ደቂ ሰባት ዘለና ዋጋ ኣርኢናሉ ኢና። ኣብ ኣተሓሕዛ ምሩኻት፣ ምስ ዝተዋግኡና መሊስና ንሰላማዊ ዘተ ኮፍ ብምባልና፣ ንዘላቒ ሰላም ብምስራሕና።
እኖታትናን ኣቦታትናን ዓወት ብምጉንፃፍ ጥራሕ ዘይኮነስ ንኽብሪ ደቂ ሰባት ብዝኸፈሉዎ ዋጋ እውን ነመስግኖም። ዝተዋጉኡ ንሰላም ክብሉ ኢዮም። ዝተዋግኡ ሰላምን ሰላማዊ መገዲን እምቢ ምስ ዝበለ ሓይሊ ኢዩ።
ደቂ ወፈርቲ ዓድዋ ኢና። ንሰላም ቅድሚት ንህብ ኢና። ሎሚ እውን ፀላእትና ካብ ዝተሰሓሓተ ስልሒት ከምዘይወፅኡ ንፈልጥ ኢና። ብሰላማዊ መገዲ ዝመፅኡና ምቕባል ካብ ዓድዋ ዘመትቲ ተማሂርና ኢና። ብሰላም ንዘይመፅኡ ምቕፃዕ ካብ ዓድዋ ዘመትቲ ርኢና ኢና። ንሕና እውን መገዲ ሰላም ቀዳሞት ኣቦታትና ንመርፅ ኢና። ነገር ግን ከም ቀዳሞት ኣቦታትና፣ ንክልቲኡ ኩሉ ግዘ ድሉዋት ኢና። ደቂ ወፈርቲ ዓድዋ ስለዝኾንና።
ሰናይ በዓል ይኹን።
ኢትዮጵያ ብፃዕሪ ደቃ ተሓፊራን ተኸቢራን ንዘለኣለም ትንበር!!
ፈጣሪ ንኢትዮጵያን ህዝባን ይባርኽ!
22 ለካቲት፣ 2017 ዓ.ም