ኦቲዝም እንታይ እዩ?

ኣዲስ ኣበባ፣ 26 መጋቢት፣ 2017 (ኤፍ ኤም ሲ)ኦቲዝም ሕማም ዘይኰነስ ሓደ ሰብ ሒዝዎ ዝውለድን ንምሉእ ዕድመ ዝፀንሕን ኵነታት እዩ።

ሕክምናዊ መፀውዒኡ ‘ኦቲዝም ስፔክትረም ዲስኦርደር’ ወይ ኤኤስዲ ይበሃል።

ገለ ሰባት ግን ኣብ ክንዲ ኤኤስዲ፥ “ኦቲዝም ስፔክትረም ኮንዲሽን” ወይ ኤኤስሲ ዝብል መፀውዒ ይመርፁ።

ምኽንያቱ ዛጊት ብንፁር ’ኳ እንተዘይተፈልጠ፥ ኦቲዝም መብዛሕትኡ ግዜ ካብ ኣዋልድ ንላዕሊ ኣብ ኣወዳት ከምዘጋጥም ይግለፅ።

ምዝ’ዚ ኵነታት ዝነብሩ ሰባት ፀገም ምዕባለ ስለዝህልዎም ምስ ካልኦት ዘለዎም ርክብ ባህርያትን ማሕበራዊ ህይወቶምን ከምዝፅለዉ እውን ሰብ ሞያ ሕክምና ይገልፁ።

ምልክታት ኦቲዝም

ምልክታት ኦቲዝም ክሳዕ ደሓር ከይተረኣዩ ክፀንሑ ተኽእሎ ኣሎ። ብተወሳኺ ሓደ ሰብ ኦቲስቲክ ከምዝዀነ ወይ ኦቲዝም ከምዘለዎ ብምርኣይ ጥራይ ክፍለጥ ኣይኽእልን።

ስለዝዀነ ድማ ንገለ ወለዲ እዚ ኵነታት ኣብ ደቆም ምህላዉ ንምልላይ በዳሂ ክኸውን ተኽእሎ ኣሎ።

ይኹን እምበር ኦቲዝም ዘለዎም ህፃናት ኣብ ምሉእ ዓቕሞም ንኽበፅሑ ኣብ ምሕጋዝ ብኣግኡ ኣቓልቦ ምርካቦም ወሳኒ እዩ።

ኦቲዝም ብቐንዱ ብተፈጥሮ ብጀነቲካዊ ፀገም ዝመፅእ’ኳ እንተዀነ፥ ፅንኩርነቱ ግን ብሕብሓብ ወይ ብከባብያዊ ረቛሒታት ክፅሎ ከምዝኽእል ውድብ ጥዕና ዓለም ይሕብር።

ቅዲ ኣተዓባብያ ከምኡ’ውን ወለዲ፣ ኣሕዋት፣ መሓዙትን ብሓፈሻ ማሕበረሰብን ኣብ ኦቲዝም ዘለዎም ኣረኣእያ ኣገደስቲ ረቛሒታት ምዃኖም ቢቢሲ ፀብፂቡ።