የጁገል ቅርስ ልማትና ጥበቃ ሥራ በተቀናጀ መልኩ እየተከናወነ ነው – አቶ ኦርዲን በድሪ

አዲስ አበባ፣ መጋቢት 25፣ 2017 (ኤፍ ኤም ሲ) ሶስተኛው ምዕራፍ ዓለም አቀፉ የጁገል ቅርስ የኮሪደር መልሶ ልማትና ጥበቃ ስራ በተቀናጀ መልኩ እየተከናወነ እንደሚገኝ የሐረሪ ክልል ርዕሰ መስተዳድር ኦርዲን በድሪ ገለፁ።

ርዕሰ መስተዳድሩ በዓለም አቀፉ የጁገል ቅርስ ሶስተኛ ምዕራፍ የተጀመረውን የኮሪደር መልሶ ልማት ሥራ ተዘዋውረው ተመልክተዋል።

በዚህ ወቅት አቶ ኦርዲን እንደገለፁት÷ ብዝሃ ኢኮኖሚን ለመገንባት እንዲያስችሉ ልዩ ትኩረት ተሰጥቶ በመተግበር ላይ ካሉ ዋና ዋና የኢኮኖሚ አውታሮች መካከል ቱሪዝም አንዱ ነው።

ይህንን መሰረት ባደረገ መልኩ በክልሉ የቱሪዝም መዳረሻዎችን በማልማት አበረታች ውጤቶች መመዝገባቸውን ነው የገለጹት፡፡

በተለይ ካሁን ቀደም ዓለም አቀፉ የጁገል ቅርስ ከመንግስት በጀት ሳይያዝለት በተቋማት እና ህብረተሰብ ተሳትፎ የተከናወኑ የቅርስ ጥገናና ልማት ሥራዎች አበረታች ውጤቶችን አስገኝተዋል ብለዋል።

ቀደም ብለው ከተሰሩ ሥራዎች ልምድ በመውሰድ 3ኛው ምዕራፍ የዓለም አቀፉ የጁገል ቅርስ ልማትና ጥበቃ ስራ በተቀናጀ መልኩ እየተከናወነ እንደሚገኝም ገልፀዋል።

በ3ኛው ምዕራፍ የጁገል መልሶ ልማት ሥራም የጁገል መንገዶችን በአካባቢው የሚገኙ ጥርብ የድንጋይ ሀብትን በመጠቀም የማስዋብ ስራዎች ተጠናክረው ቀጥለዋል ብለዋል።

የተጀመሩ የቅርስ ጥበቃ ስራዎች የውጭና የሀገር ውስጥ ጎብኚዎችን ለመሳብና የቆይታ ጊዜያቸውን በማራዘም ገቢ ማመንጨት የሚያግዙ መሆኑን መግለጻቸውን የክልሉ ኮሙኒኬሽን መረጃ ያመላክታል።

በመልሶ ልማት ስራው የአካባቢውን ማህበረሰብ በተለይ ወጣቱን የስራ ዕድል ተጠቃሚ ለማድረግ ትኩረት መሰጠቱንም ገልፀዋል።

የተጀመረውን የመልሶ ልማት ስራ በጥራት እና በፍጥነት በተያዘለት ሁለት ወር ግዜ ውስጥ ለማጠናቀቅ ርብርብ እንደሚደረግም አረጋግጠዋል።