የብዝኃ-ዘርፍ ሪፎርሙ አረሙን ከስንዴው እየለየ ነው- ምክትል ጠቅላይ ሚኒስትር ተመስገን

አዲስ አበባ፣ መጋቢት 26፣ 2017 (ኤፍ ኤም ሲ) ኢትዮጵያ የጀመረችው ብዝኃ-ዘርፍ ሪፎርም አረሙን ከስንዴው እየለየ በአስደናቂ የስኬት መንገድ በመፈጸም ላይ ይገኛል ሲሉ ምክትል ጠቅላይ ሚኒስትር ተመስገን ጥሩነህ ገለጹ፡፡

የሀገራዊ ለውጡን ሰባተኛ ዓመት ስኬታማ ጉዟችንን እያከበርን ባለንበት ወቅት፤ “ልኅቀት በሰው ተኮር አገልግሎት” በሚል መሪ ሐሳብ የፌደራል ከፍተኛ የመንግሥት አመራሮች ተሞክሮ ተኮር ሥልጠና አስጀምረናል ብለዋል አቶ ተመስገን።

የኢትዮጵያውያን የዘመናት መሻት የሆነውን የተሳለጠ የመንግሥት አገልግሎትና አሥተዳደር ሥርዓት ለመገንባት እና በጽኑ መሠረት ላይ ለማኖር የሚያችል ሪፎርም እያካሄድን ነው ሲሉም ገልጸዋል።

ሪፎርሙ ለአፍሪካ ተምሳሌት የምትሆን፣ የበለፀገችና ጠንካራ ሀገርን ለመገንባት እንዲሁም የሕዝባችንን የአገልግሎት ፍላጎት ለማርካት ወሳኝ ሚና አለው ሲሉ በማኅበራዊ ትሥሥር ገጻቸው አጋርተዋል፡፡

ይህንን ታሪካዊ ምዕራፍ በማሳካት ዘመን ተሻጋሪና ጠንካራ የመንግሥት የአገልግሎት ሥርዓት ለመዘርጋት ሁሉም የመንግሥት አመራር እና ሠራተኛ በሚጠበቅበት ደረጃ መትጋት እንደሚጠበቅበትም አስገንዝበዋል፡፡

ተሞክሮ ተኮር ስልጠናው የሚካሄደው የመንግሥት አገልግሎትና አሥተዳደር ሥርዓትን ለመገንባት በሚያስችሉ በፀደቁ እና በረቂቅ ደረጃ ባሉ ሠነዶች ላይ መሆኑንም አስታውቀዋል፡፡

በሂደቱም የእስከ አሁን የሪፎርሙ አፈፃፀም የደረሰበት ደረጃ፣ ያጋጠሙ ችግሮች እና የመፍትሔ አቅጣጫዎች ላይ ውይይት እንደሚደረግም አመላክተዋል፡፡